ХVII «Еуразия» халықаралық кинофестивалін ұйымдастыру және өткізу ережелері
1. Жалпы ережелер
1.1. Осы ХVII «Еуразия» халықаралық кинофестивалін ұйымдастыру және өткізу ережелері (бұдан әрі – Ережелер) ХVII «Еуразия» халықаралық кинофестивалін (бұдан әрі – Кинофестиваль) өткізуді ұйымдастыру тәртібін айқындайды.
1.2. Кинофестивальдің құрылтайшысы Қазақстан Республикасының Мәдениет және ақпарат министрлігі (бұдан әрі – Министрлік) болып табылады.
2. Кинофестивальдің мақсаттары мен міндеттері
2.1. Кинофестивальдің мақсаты – қазақстандық киноны өнер және индустрия ретінде дамыту, кинематографиялық өнерге деген көпшіліктің қызығушылығын арттыру, халықаралық ынтымақтастықты нығайту.
2.2. Кинофестивальдің міндеттері:
2.2.1. қазақстандық фильмдерді дистрибуциялау және бірлескен өнім үшін Еуропа, Азия, Америка, Орталық Азия және ТМД елдеріндегі перспективалы әріптестерге ерекше назар аудара отырып, кино саласындағы халықаралық байланыстарды нығайту және дамыту;
2.2.2. кинофестивальді Еуропа мен Азия арасындағы бірегей мәдени және кинематографиялық көпір ретінде айқындау;
2.2.3. қазақстандық киноиндустрияның үздік киножобалары мен жетістіктерін ұсыну және ілгерілету;
2.2.4. халықаралық кинематографиялық қоғамдастықпен ынтымақтастықты дамыту;
2.2.5. Еуропа және Азия елдерінің продюсерлері, инвесторлары мен прокатшылары арасында бизнес-байланыстарды жолға қою және ілгерілету;
2.2.6. «А» санатындағы фестивальдерде, басқа да халықаралық кинофестивальдерде қазақстандық фильмдерді ілгерілету;
2.2.7. қазақстандық көрерменнің отандық киноға деген қызығушылығы мен патриотизмін қалыптастыру;
2.2.8. Қазақстанның мәдени және кинематографиялық өмірі туралы ақпаратты отандық және шетелдік БАҚ арасында тарату.
2.3. Кинофестиваль халықаралық кинопродюсерлер қауымдастығының Федерациясымен (FIAPF) мамандандырылған конкурстық фестиваль ретінде аккредиттелген.
2.4. Кинофестиваль Қазақстан Республикасының Алматы қаласында 2024 жылы қарашаның 24-30 аралығында өткізіледі.
2.5. Кинофестивальдің ресми тілдері: қазақ, орыс және ағылшын.
3. Кинофестивальді өткізу тәртібі
3.1. Кинофестиваль бағдарламасы келесі іс-шаралардан тұрады:
3.1.1. Кинофестивальдің салтанатты ашылу рәсімі;
3.1.2. Алматы қаласының көп залды кинотеатрлар желісіндегі кино көрсетілімдері;
3.1.3. Iскерлік алаң (дөңгелек үстелдер, панельдік пікірталастар, воркшоптар);
3.1.4. Кинофестивальдің жабылу салтанаты.
3.2. Кинофестивальді ұйымдастыруды, дайындауды және өткізуді «Шәкен Айманов атындағы «Қазақфильм» ұлттық киностудиясы» акционерлік қоғамы (бұдан әрі – Ұйымдастырушы) жүзеге асырады.
3.3. Кинофестивальге қатысу үшін аумақтық шектеулерсіз кез келген елдің кино ұйымдары мен кинематографистері шақырылады.
3.4. Кинофестиваль бағдарламалары:
3.4.1. Халықаралық конкурстық бағдарлама International Competition – 2023—2024 жылдары Азия мен Еуропадан шығарылған, ұзақтығы 70 минуттан кем емес 10 (он) кем емес толықметражды ойын фильмдері;
3.4.2. Орталық Азия және Түркі әлемі елдерінің конкурстық бағдарламасы – Орталық Азия мен Түркі әлемі елдерінен 2023—2024 жылдары шығарылған, ұзақтығы 70 минуттан кем емес 8 (сегіз) толықметражды ойын фильмдері;
3.4.3. Кемінде 3 (үш) фильмді қоса алғанда – мерейтойлық фильмдер, кинофестивальдің ашылу және жабылу фильмдері, әртүрлі дәуірлер мен жанрлардағы әлемдік кино шеберлерінің фильмдерінің ретроспективасын ұсынатын «ЕРЕКШЕ ОҚИҒА» конкурстан тыс кинобағдарламасы.
3.4.4. «ӘЛЕМДІК ПАНОРАМА» конкурстан тыс бағдарламасы – 2023—2024 жылдардағы ірі халықаралық кинофестивальдердің үздік жүлдегер-фильмдерінің көрсетілімдері – кемінде 3 (үш) фильм;
3.4.5. Eurasia KZ конкурстан тыс бағдарламасы шеңберінде кемінде 3 (үш) үздік жаңа қазақстандық фильмдерді көрсету;
3.4.6. Eurasia Industry Program – іскерлік алаң, кемінде екі мастер-класс, кемінде екі шығармашылық кездесу, кемінде бір панельдік пікірталас немесе дөңгелек үстел өткізу;
3.5. Кинофестивальдің кинобағдарламаларына қатысатын фильмдердің жалпы саны – кемінде 30 (отыз);
3.6. Кинофестивальдің конкурстан тыс кинобағдарламаларына қатысушы фильмдердің санын әрбір конкурстан тыс кинобағдарламаның мақсаттары мен міндеттеріне сәйкес кинофестивальдің бағдарламалық қызметі айқындайды.
3.7. Кинофестиваль бағдарламаларына қатысуға фильм ұсынғысы келетіндер Кинофестивальдің ресми веб-сайтында өтінім формасын 2024 жылғы 31 қазан сағат 18.00-ден кеш емес мерзімге дейін толтырулары тиіс.
3.8. Кинофестивальдің конкурстық бағдарламасына ағылшын тілінде субтитрлері бар DCP сандық форматындағы фильмдер қатысады. Кинофестивальдің конкурстық бағдарламасына қабылданған фильмдердің көшірмелері Ұйымдастырушыға жіберілуі не серверге 2024 жылғы 15 қарашадан кешіктірілмей жүктелуі тиіс.
3.9. Кинофестивальдің басқа бағдарламаларына келесі форматтағы фильмдер қабылданады: DCP, mov. Кинофестивальдің басқа бағдарламаларында көрсету үшін қабылданған фильмдердің көшірмелері Ұйымдастырушыға жіберілуі немесе серверге 2024 жылғы 15 қарашадан кешіктірілмей жүктелуі тиіс.
3.10. Кинофестиваль бағдарламаларының біріне таңдалған фильмді оның қатысуы ресми расталғаннан кейін қайтарып алу мүмкін емес.
3.11. Әр фильм кинофестиваль барысында 2 (екі) реттен көп емес көрсетілуі мүмкін.
3.12. Қатысушыларға олардың картиналарын кинофестиваль бағдарламаларына іріктеу туралы хабарлағаннан кейін фильм авторлары Дирекцияға қатысу туралы растауды және келесі құжаттарды жіберуі керек:
3.12.1. SRT форматында ағылшын тілінде субтитрленген Парақ (диалогтық парақтар);
3.12.2. фильм туралы қажетті ақпарат пен материалдар, соның ішінде постер, трейлер, синопсис, түсірілім тобы туралы мәліметтер, фильмнен 3-4 кадр, режиссердің фотосуреті, режиссердің өмірбаяны мен фильмографиясы.
3.13. Кинофестивальдің конкурстық және конкурстан тыс бағдарламалары фильмдерінің көшірмелерін цифрлық жеткізу бойынша шығыстарды шақырушы тарап көтереді. Кинофестиваль серіктес кинофестивальдермен фильм көшірмелерін тасымалдау шығындарын бөлісу құқығын өзіне қалдырады. Шақырушы тарап кинофестиваль бағдарламаларына қатысушылардың коммерциялық емес көрсетілім құқықтарын төлейді.
3.14. Кинофестивальдің конкурстық бағдарламасына толықметражды фильмдердің қатысуы марапаттау рәсіміне толықметражды конкурстық фильмнің бір өкілінің (режиссер, актер/актриса, продюсер) міндетті түрде қатысуын көздейді.
3.15. Кинофестивальде қонақтардың болу және Аккредиттеу мерзімдері мен шарттарын Ұйымдастырушы бекітеді және қонақтардың жеке шақыруларында ескертіледі.
4. Кинофестивальдің қазылар алқасы және номинациялары
4.1. Конкурстық фильмдерді бағалау үшін әрбір конкурстық секция бойынша кемінде 5 (бес) адамнан тұратын халықаралық қазылар алқасы (бұдан әрі – қазылар алқасы) құрылады.
Қазылар алқасының құрамын Ұйымдастырушы бекітеді.
Қазылар алқасының құрамына конкурстық картиналарды жасауға қатысқан немесе коммерциялық прокатқа қатысқан адамдар кіре алмайды.
4.2. Кинофестивальге Азия киносын насихаттау жөніндегі халықаралық ұйымның (НЕТПАК) және ФИПРЕССИ-дің халықаралық киносыншыларының тәуелсіз халықаралық қазылар алқасы, әрқайсысында кемінде 3 (үш) адам, қатысады.
4.3. Екі жаққа да жол жүру, тұру, алымдарды төлеу, сондай-ақ қазылар алқасы мүшелерінің болуы кезінде көлік шығындарын Ұйымдастырушы көтереді.
4.4. Қазылар алқасы номинациялар бойынша сыйлықтардың иегерлерін анықтайды, "Еуразия" мүсіншелері мен ақшалай сыйақылар береді:
4.4.1. Халықаралық конкурс:
• Халықаралық байқау секциясындағы үздік фильм үшін Гран-при – 4 000 000 теңге (фильм продюсеріне беріледі);
• Халықаралық байқау секциясындағы үздік режиссерлік жұмысы үшін жүлде – 2 000 000 теңге;
• Қазылар алқасының арнайы жүлдесі – 1 500 000 теңге;
• Халықаралық конкурс секциясында ер адам рөлін үздік орындағаны үшін жүлде – 1 500 000 теңге;
• Халықаралық байқау секциясында әйел адам рөлін үздік орындағаны үшін жүлде – 1 500 000 теңге.
4.4.2. Орталық Азия және Түркі әлемі конкурсы:
• Үздік фильм үшін Гран-при – 4 000 000 теңге (фильм продюсеріне беріледі);
• Үздік режиссерлік жұмыс үшін сыйлық – 2 000 000 теңге;
• Қазылар алқасының арнайы сыйлығы – 1 500 000 теңге;
• Ер адам рөлін үздік орындағаны үшін жүлде – 1 500 000 теңге;
• Әйел адам рөлін үздік орындағаны үшін жүлде – 1 500 000 теңге;
4.4.3. Қосымша сыйлықтар:
• Кинематографқа сіңірген еңбегі үшін Шәкен Айманов атындағы жүлде – 1 000 000 теңге;
• Көрермендер көзайымы сыйлығы.
4.5. Ақшалай сыйлықақы төлеу тәртібі:
4.5.1. Қазақстан Республикасының резиденттері үшін – кинофестивальдің ресми жабылу рәсімінен кейін 10 (он) банктік күн ішінде жеке шотқа аудару жолымен теңгемен;
4.5.2. бейрезиденттер үшін – кинофестивальдің ресми жабылу рәсімінен кейін 10 (он) банк күні ішінде жеке шотқа аудару арқылы еркін айырбасталатын валютада;
4.5.3. ҚР Салық заңнамасына сәйкес резидент емес қонақтардың ақшалай жүлделерінен жеке табыс салығын есептеу табыстың есептелген сомасына 20 пайыз мөлшерлемесін қолдану жолымен жүргізіледі. Резиденттер резиденттік сертификатын ұсынуы керек.
4.5.4. Қазақстан Республикасы резиденттерінің ақшалай сыйлықтарына төлем көзінен 10% ставка бойынша ЖТС салынады.
4.6. Қазылар алқасы барлық байқау фильмдерін көруге және талқылауға қатысады.
4.7. Қазылар алқасы ашық дауыс беру арқылы шешім қабылдайды.
4.8. Жүлделерді беру туралы шешім қазылар алқасының барлық мүшелері қол қоятын хаттамамен ресімделеді.
4.9. Қазылар алқасының шешімі кинофестивальдің жабылу салтанатында жарияланады, түпкілікті болып табылады және қайта қарауға жатпайды.
4.10. Қоғамдық және өзге де ұйымдар, демеушілер кинофестиваль қатысушыларына өздерінің сыйлықтары мен жүлделерін белгілей алады, олар Ұйымдастырушымен 2024 жылғы 20 қарашаға дейін келісілуі тиіс.
