Жеңімпаздарға арналған дәстүрлі марапаттардан бөлек "Еуразия" фестивалінде әр жылдары өнерге қосқан үлесі үшін көрнекті отандық және шетелдік кинематографистерге де сыйлықтар табысталды. Бүгін біз осы даңқты есімдерді еске түсіруді шештік.
2007
"Әлемдік кинематографияға қосқан үлесі үшін" сыйлығымен әйгілі британдық актриса, "Алтын глобус" иегері Жаклин Биссет марапатталды.
"Кино өнерінің дамуына қосқан үлесі үшін" жүлдесі – Қазақстанның Халық әртісі Нұрмұхан Жантөринге (қайтыс болғаннан кейін) бұйырды.
2008
"Әлемдік кино өнерінің дамуына қосқан зор үлесі үшін" - кинорежиссер Болотбек Шамшиев (Қырғызстан) және кинопродюсер Майкл Фицджеральд (АҚШ) марапатталды.
2009
«Әлемдік кинематографқа қосқан үлесі үшін» әйгілі Голливуд актері және режиссері Кевин Костнер марапатталды.
2013
«Әлемдік өнерге қосқан үлесі үшін сыйлығы» - актер және француз өнерінің тірі аңызы Шарль Азнавурға бұйырды.
2014
"Әлемдік кино өнерінің дамуына қосқан үлесі үшін" сыйлығы - танымал грек-француз режиссері және "Оскар" сыйлығының екі дүркін иегері Коста-Гаврасқа бұйырды.
2019
"Қазақстандық киноны дамытуға қосқан үлесі үшін" жүлдесімен – Қазақстанның Халық әртісі Досхан Жолжақсынов марапатталды.
2022
"Орталық Азия киносының дамуына қосқан үлесі үшін" жүлдесі – өзбек киносының шебері, режиссер Әли Хамраевқа бұйырды.
"Қазақ киносының дамуына қосқан үлесі үшін" сыйлығымен – қоғам қайраткері, мәдениеттанушы, 1982-1988 жылдардағы "Қазақфильм" киностудиясының бас редакторы және көркемдік жетекшісі Мұрат Әуезов марапатталды.
